CEBU CITY- Nailhan nga ‘gahi’ sa lungsod sa Argao nga giingong gikahadlokan sa mga residente ang gipusil-patay sa gawas sa iyang giabangan nga balay niadtong milabayng sa Sitio All Season 2, Barangay Cogon Pardo.
Giila ang biktima nga si Joel Comaling, 36-anyos, residente sa Barangay Cogon Pardo apan lumad nga taga Barangay Jampang, bukirang barangay sa lungsod sa Argao.
Basi sa imbestigasyon sa Inayawan police station nga sa dihang paingon kini matulog kay ang biktima uban sa iyang kaipon nga si alyas Jenny kalit lang nga milagubo ang atop sa ilang balay human gibato.
Nasuko nga migawas ang biktima apan giingong kalit lang kini nga gipusil sa wala mailhing mamumuo sa dughan niini.
Gibutyag sa kaipon niini sa wala pa ang pagpamusil migawas ang iyang pares aron mopalit og kape duol sa ilang panimalay.
Naagi-an niini ang tapok sa mga batan-on ug iya matod pa kini giingnan kon kinsay bagsik diri dayong lakaw.
Apan matod ni Jenny nga komedya lamang kini sa biktima tungod kay ang uban sa mga nag tapok kaila ra usab niya.
Si Police Lieutenant Colonel Maria Theresa Macatangay, deputy city director for operations sa Cebu City Police Office namahayag nga aduna na silay giila nga person of interest.
Diin ang maong POI kay nalambigit sa illegal nga drugas apan wala lang una mo detalye sa ubang mga background niini ang opisyal.
Apan base sa nakuha nga kasayuran nga ang biktima nga si Comaling giila nga drug personality sa probinsya sa Sugbo nga nakig pinusilay sa mga police sa lungsod sa Argao.
Ang hepe sa Argao police station Police Major Janus Giangan mitug-an nga ang si Joel Comaling maoy nag-ambush kanila kaniadto atol sa ilang pag serve og warrant of arrest sa iyang igsuon nga si Jonathan sa Barangay Jampang niadtong Agusto 20, 2024.
Atol sa binayloay sa bala naigo ang maong biktima apan nakasibat samtang ang iyang mga kauban nadala sa Isidro Kintanar Memorial Hospital sa Brgy. Bogo.
