Gihulagway ni Atty. Neri Colmenares, usa ka Human Rights Lawyer, nga maayo ang gipakitang opening statements sa matag habig tali sa prosekusyon ug depensa sa nagpadayong impeachment trial batok kang Bise Presidente Sara Duterte.
Sa eksklusibong pakighinabi kaniya sa Bombo Radyo Cebu, gipasabot ni Colmenares nga nagtuyok ang diskusyon sa argumento nga dili absolute o walay kasegurohan ang proteksyon sa bank secrecy tungod kay duna kini mga exemptions ubos sa balaod diin mamahimo kining ablihan.
Gani, miangkon usab ang depensa nga ang impeachment court adunay gahum sa pagmando nga ipaubos sa pakisusi ang mga bank ug BIR accounts, diin bisan gani ang mga ordinaryong korte sa nasud adunay katungod sa paghimo niini.
Dugang pa ni Colmenares, ang gipadagan nga argumento karon sa depensa mao ang giingong paglapas sa “due process rights” ni VP Duterte.
Imbes nga makigdebate kung mahimo ba nga ablihan ang maong mga dokumento, mas gikuwestiyon sa depensa kung ngano nga lakip ang mga BIR ug bank accounts niadtong tuig 2007, sa dihang bise mayor pa si Duterte sa Davao, ang giapil paghalugkat, nga alang kanila dili na unta kinahanglan ug klaro.
Apan alang ni Atty. Colmenares, ang labing importante nga baruganan mao nga walay hingpit nga proteksyon sa privacy sa banko ilabi na kung ang hisgutan mao na ang isyu sa ill-gotten wealth o ang kinatibuk-ang pundo sa katawhan nga posibleng nakurakot.
