Nikita og P214.75 bilyon ang industriya sa pasugalan sa Pilipinas gikan sa Enero hangtod Hunyo 2025, sumala sa datos gikan sa Philippine Amusement and Gaming Corporation (PAGCOR).
Kini adunay 26% nga usbaw gikan sa P171 bilyones sa susamang panahon sa niaging tuig.
Ang sektor sa electronic gaming sama sa e-games, e-bingo, ug bingo maoy labing dako nga natampo, nga nakakuha og P114.83 bilyones o 53.47% sa kinatibuk-ang kita.
Samtang ang mga lisensyado nga casino, apil na sa Metro Manila, Clark, Cebu, La Union, ug Rizal, niamot og P93.36 bilyones o 43.47%.
Adunay P6.56 bilyones usab o 3.06% sa kita gikan sa PAGCOR-operated casinos.
Matud ni PAGCOR Chairman Alejandro Tengco, ilang tumong mao ang pagsiguro nga ang pag-uswag sa industriya subay sa responsable nga pagdula.
Kabahin niini, nakigsabot ang PAGCOR sa Ad Standards Council aron higpitan ang regulasyon sa mga advertisement sa sugal, ug gimando nga tangtangon ang mga ad sa sugal sa publikong lugar ug primetime TV sa Agosto 15 ning tuiga.
