Nadakpan ang usa ka garbage collector sa Pinoy Basurero Corporation sa Barangay Mabolo human kini nangolekta ug mga basura nga wala ma-segregate kagahapong adlawa Biyernes, Hunyo 5, 2026.
Kini human sa hugot nga gipatuman sa kagamhanan sa Barangay Mabolo ang pagsunod sa mga lagda sa Republic Act No. 9003 o ang Ecological Solid Waste Management Act of 2000, ingon man ang “No Segregation, No Collection” nga polisiya sa barangay.
Matud ni Camilo Devila Jr. ang Public Information Officer sa Barangay Mabolo, nga ubos niini nga polisiya, dakpon ug isyuhan ug citation ticket ang bisan kinsang mapamatud-ang molapas sa maong ordinansa.
Gipasiugda sa barangay nga ang maong ordinansa hugot nga gipatuman dili lamang sa mga lumolupyo sa Barangay Mabolo kondili sa tanan.
Gilauman usab nga ang mga empleyado ug public servants mao ang mag-una sa pagpakita ug maayong ehemplo pinaagi sa pagsunod sa mga balaod ug polisiya nga gipatuman sa komunidad.
Giklaro usab sa Barangay nga ang kung ugaling madakpan tungod sa kalapasan sa mismong mga lagda, ang pagbayad sa multa mapunta kini sa buhatan sa kagamhanan sa Dakbayan sa Sugbo gumikan kay sa siyudad nahisakop ang citations niini.
