MANDAUE CITY,CEBU- Niluwat og pamahayag si kanhi Cebu Gobernador Gwendolyn Garcia nga dili na iyang responsibilidad ang 397 ka sako sa NFA rice nga wala mabaligya sa Mandaue City ubos sa Sugbo Mercadong Barato (SMB) program, kondili bahin na kini sa lokal nga kagamhanan.
Ang SMB program, nga gitumong sa paghatag og barato nga bugas sa kabus nga mga Sugbuanon, gipatuman sa daghang mga LGU pinaagi sa koordinasyon sa Provincial Treasurer’s Office ug sa mga lokal nga social welfare offices.
Gipasabot ni Garcia nga kusog ang pagbaligya sa bugas sa ubang LGUs, apan sa Mandaue, 397 sa 1,198 ka sako ang nagpabiling wala mabaligya sukad Enero 2024.
Apan, sa dihang gipangutana si Garcia bahin sa MOA atol sa presscon, wala niya kini gitubag.
Una niini, gisusi sa dakbayan ang stock, ug gimando ni Mayor Thadeo Jovito “Jonkie” Ouano nga dili na kini ipang-apod human masuta nga posibleng makadaot sa panglawas ang dugay nang nakaimbak nga bugas.
Nagplano unta ang Mandaue City nga ibalik ang bugas sa probinsya, pero napugngan ang lihok tungod sa kakulang sa Memorandum of Agreement (MOA) tali sa duha ka partido.
