CEBU CITY-Nipadayag og kaandam nga motabang sa Cebu City Government ang Kagamhanan sa Probinsiya sa Sugbo sa higayon nga mahatagan og kahigayonan nga mag-host sa Palarong Pambansa sa 2024.
Kini maoy gipahibawo ni Gobernador Gwendolyn Garcia atol sa pakigtagbo nila ni John Pages, pangulo sa Cebu City Sports Commission, niadtong Martes, Abril 11, sa Kapitolyo diin didto usab si Board Member Glenn Anthony Soco.
Gibutyag ni Pages nga dul-an sa 12,000 ka mga atleta gikan sa 17 ka rehiyon ang gipaabot nga mosalmot sa 27 ka sporting events atol sa Palaro, nga mahitabo sa Hulyo sa sunod tuig sulod sa 10 ka adlaw.
Gihangyo sa gobernador si Pages nga iapil ang Kagamhanan sa Probinsiya sa ilang mga plano sa higayon nga ang Palaro Board ug ang Departamento sa Edukasyon mohatag sa Cebu City og awtoridad sa pag-host sa maong kalihukan.
Sa pikas bahin si City Councilor Dondon Hontiveros, chairman sa Committee on Sports, niingon nga ang Palaro adunay dakong epekto sa turismo ug ekonomikanhong kalihokan sa Sugbo sanglit tambongan kini sa kapin 20,000 ka mga tawo, apil na ang mga pamilya sa mga atleta.
Kung diin ang Cebu City Hall nigahin og pasiunang budget nga P65 milyones alang sa renovation sa Cebu City Sports Center, ang venue sa Palarong Pambansa niadtong 1994.
