Giawhag ni Senate President Sherwin Gatchalian ang mga awtoridad nga sigurohon nga ang pagdakop kang Sen. Ronald “Bato” dela Rosa ipahigayon sa luwas ug hapsay nga paagi, aron malikayan ang kapintasan ug posibleng mga kaswalti sa mga sibilyan ug mga personahe sa pagpatuman sa balaod.
Gikanayon ni Gatchalian nga kritikal ang pagsiguro sa kaluwasan ni Dela Rosa ug sa mga opisyal nga nagpahigayon sa operasyon, ilabi na nga adunay mga risgo nga dala ang maong matang sa operasyon.
Gipasiugda niya nga kinahanglang dumalahon ang pagdakop sa hustong paagi, ilabi na human sa mga pahayag gikan sa Department of the Interior and Local Government (DILG) nga nagpasabot nga ang operasyon mahimong mosangpot sa kapintasan.
Si Interior Secretary Jonvic Remulla nagpahayag kaniadto nga moabot sa 10,000 ka tawo ang posibleng mamatay kung pugson ang pagdakop kang Dela Rosa. Tungod niini, matod ni Remulla, ang gobyerno kasamtangang nakig-negosyar aron kombinsihon ang senador nga motahan.
Bisan pa niana, gipamugos ni Gatchalian nga kinahanglang ipakita sa gobyerno ang awtoridad niini, ilabi na tungod sa mga taho nga adunay armadong grupo nga giingong nanalipod kang Dela Rosa.
Ang Senate President nagpahayag na kaniadto nga dili angay makig-negosyar ang gobyerno sa mga armadong grupo nga walay legal nga pagtugot sa paghupot og armas—ilabi na kung ang maong mga grupo nalambigit sa mga kriminal o teroristang organisasyon.
Matod niya, mahimong magpakita og kahuyang ang gobyerno kung makig-negosyar kini sa mga grupo nga angay untang magpasakop sa balaod.
Hinuon, giklaro ni Gatchalian nga wala siyay kompletong detalye bahin sa grupo nga giingong nanalipod sa senador. Nasabtan usab niya kung nganong nagpugong ang mga awtoridad sa pagpagawas sa pipila ka impormasyon, tungod sa mga konsiderasyon sa seguridad.
Kahinumdoman nga nagpahibalo ang gobyerno og ganti nga P50 milyones aron makatabang sa pagdakop kang Dela Rosa, samtang gihatagan siya sa Philippine National Police og usa ka semana aron motahan.
Si Dela Rosa nag-atubang og warrant of arrest nga giisyu sa International Criminal Court may kalabotan sa giingong mga krimen batok sa katawhan nga nahitabo atol sa kampanya batok sa droga sa administrasyon ni kanhi Presidente Rodrigo Duterte.
Samtang, nagkanayon si Gatchalian nga wala siyay nadawat nga komunikasyon gikan kang Dela Rosa, lakip na ang bisan unsang hangyo nga ibutang siya ubos sa kustodiya sa Senado. Ang katapusang higayon nga nagkaistorya sila, sumala sa taho, mao ang dihang mitambong ang senador sa Senado niadtong Mayo.
