CEBU CITY-Gitangtang sa Kagamhanan sa Dakbayan sa Sugbo ang ganghaan nga gibabag sa dalan sa Beverly Hills sa Brgy. Kalunasan human nga gituki sa Cebu City Government gumikan dili makasulod ang publiko kung gani wala’y giingong sticker nga nagkantidad og P1,500.
Diin gipangulohan sa mga sakop sa Prevention, Restoration, Order, Beautification and Enhancement team; ug sa Cebu City Disaster Risk Reduction Management Office nga mao’y nagtangtang sa ganghaan sa maong subdivision, nga inabagan sa Road Management Authority ug sa Philippine National Police, ubos sa pagdumala sa City Legal Office.
Sa pakighinabi sa Bombo Radyo Cebu News Team kang konsehal Jun Alcover Jr., giangkon niini nga usa kini sa mga nangusog nga mahatagan og askyon arun dili kini makahatag og perwisyo sa publiko ug sa mga lumulopyo.
Gani, usa kini sa mga nabiktima diin wala kini pasudla sa nagbantay gumikan wala’y nakita nga sticker ang security guard sa gisakyan sa konsehal apan, wala kini nakiglalis hilabi na nga nasayod kini nga igo lang nituman sa mando sa iyang amo ang maong nagbantay.
Subay niini, gibutyag usab sa konsehal nga sa buhi pa si anhing mayor Edgar Labella, nibisita sa buhatan niini ang mga lumolupyo ug nihangyo nga paagian pagbalik ang Beverly Hills nga gibabagan.
Ingon man nga nisaad usab kaniadto si Labella nga iyang aksyonan ang hangyo apan, wala naduso tungod sa iyang kalit nga pagtaliwan.
