CARCAR CITY, CEBU-Gatusan na ka mga baboy ang gipaubos sa ‘culling’ sa dakbayan sa Carcar sukad pa niadtong nakalabay sa Marso 11, 2023.
Gipahibalo ni Police Lieutenant Colonel Ardioleto Cabagnot, ang hepe sa Carcar City Police Station, nga posibling adunay daghang baboy ang ipaubos sa ‘culling’ karung adlawa subay sa nakalatid sa listahan sa mga identified nga barangay sa dakbayan.
Matud pa, gipangulohan sa ilahang Veterinary Office, ingon man mga representante gikan sa kaulohan ang maong ‘culling’ ug igo lang sa paghatag ug seguridad ang kapulisan.
Gidugang pa ni Cabagnot nga aduna sila’y lima ka mga quarantine checkpoints, diin istrikto nila nga gisusi ang mga dokumento sa mga live hogs nga mo agi sa ilahang area.
Gitino usab niini nga walay makasulod nga mga buhi o produkto sa baboy sa dakbayan sa Carcar, ingon man nga gidili usab ang pagpagawas niini paingon sa nagkadaiyang lugar.
Hinuon, gisiguro sa naasoy nga hepe sa kapulisan nga ‘manageable’ lang sitwasyon sa dakbayan.
