Mius-os sa 2.1 porsyento ang pagtubo sa Gross Domestic Product (GDP) sa Pilipinas mius-os ngadto sa 2.1 porsyento sa ikatulong kwarter sa 2026. Kini tungod sa pagkunhod sa sektor sa agrikultura ug industriya, bisan pa man sa padayon nga paglambo sa sektor sa serbisyo.
Matod ni National Statistician Claire Dennis Mapa, ang 2.1 porsyento nga pagtubo nga natala gikan sa Hulyo hangtod sa Setyembre mao ang pinakaubos sukad sa unang kwarter sa 2021—panahon sa kinatumyan sa pandemya. Kon dili iapil ang panahon sa COVID-19, kini ang pinakahinay nga pagtubo sa ekonomiya sa nasud sukad sa katapusang kwarter sa 2009.
Tungod niini, gipahayag sa Department of Economy, Planning and Development (DEPDev) nga dili na lagmit makab-ot sa nasud ang gi-rebisar nga target sa pagtubo nga 3.5 hangtod 4.5 porsyento alang sa maong tuig. Matod ni DEPDev Secretary Arsenio Balisacan, kinahanglan nga motubo ang GDP og 6.3 porsyento sa ikaupat nga kwarter aron lang maabot ang pinakaubos nga lebel sa maong target.
Gipasiugda sa Philippine Statistics Authority (PSA) nga ang sektor sa serbisyo ang nagsilbing nag-unang drayber sa ekonomiya, nga mitubo og 3.7 porsyento. Sa laing bahin, ang sektor sa agrikultura mius-os og 4.8 porsyento, samtang ang sektor sa industriya naluya og 0.003 porsyento—usa ka sitwasyon nga inubanan sa pagkunhod sa mga proyektong konstruksyon sa gobyerno sulod sa ika-unom nga sunod-sunod nga kwarter. Ang taas nga presyo sa lana ug mga palaliton—nga dala sa gubat sa Middle East—naghatag og dakong epekto sa ekonomiya sa nasud. Dugang pa niini ang mga epekto sa nangaging mga kalamidad ug mga kontrobersiya mahitungod sa paggasto sa gobyerno, nga nakapahuyang sa pagsalig sa mga negosyo ug sa mga konsumidor.
