Giablihan na ang unang General Congregation sa College of Cardinals, human sa pagtaliwan ni Pope Francis, nga giubanan sa kinasingkasing nga pag-ampo.
Diin anaa sa 60 ka mga cardinal ang mitambong sa panagtapok sa Synod Hall, diin sila nanumpa, subay sa Universi Dominici Gregis, ang dokumento nga naglatid sa mga lagda atol sa sede vacante ug sa pagpili sa bag-ong Santo Papa.
Gibasa ni Cardinal Kevin Farrell, Camerlengo sa Simbahang Katoliko, ang kataposang testamento ni Pope Francis ug nakahukom usab ang mga cardinal nga i-postpone ang gikatakdang beatification rites hangtod nga makalingkod ang bag-ong Santo Papa.
Isip kabahin sa Novemdiales o siyam ka adlaw nga pagbangotan, ang mga santos nga misa magsugod sa Domingo, Abril 27 ug magpadayon ang mga misa kada adlaw sa alas 5 sa hapon.
Tulo usab ka cardinal ang gitudlo nga motabang sa pagdumala sa simbahan samtang bakante ang posisyon sa Santo Papa diin mao sila si Cardinals Pietro Parolin, Stanisław Ryłko, ug Fabio Baggio.
