CEBU CITY-Gikatahong ‘generally peaceful’ ang adlaw sa mga santos nga gipahigayon gahapon diin ang mga gitutukan nga mga dagkong cementeryo, walay natalang mga dagkong kagubot.
Mao kini ang gibutyag ni Police Lieutenant Colonel Janette Rafter, Deputy Director for Operations sa Cebu City Police Office apan, bisan paman niini padayon sa gihapon ang ilang pagbantay sa seguridad hilabi na sa gabii gumikan mas modagsa ang mga mobisita sa mga sam-ang.
Dugang pa ni Rafter nga magpabilin usab ang pagmatngon sa publiko ug ikonsiderar ang mga posibleng makamugna og kagubot sama sa pagdala og mga pribadong sakyanan nga maoy hinungdan sa traffic gumikan sa ka-busy sa kadalanan.
Nasayran nga ang mga ‘untoward incidents’ nga natala mao ang mga pagsikop sa mga pipila ka mga hinagiban diin gigamit sa pagpanglimpyo sa mga nitso.
Apan, una ng nipahimangno ang kapulisan nga mopahigayon sa paglimpyo niadtong Oktubre 31 hinungdan nga wala na’y rason nga magdala pa kini og mga hinagiban.
