Moabot og kapin usa ka oras ang pagpakigkumbati sa mga bombero batok sa kalayo una pa kini ideklarar nga fire under control sa nahitabong sunog kaganihang hapon sa Upper Malibu, Barangay Subangdaku, Mandaue City.
Nadawat ang alarma pasado alas 4 sa hapon, ug gisaka kini sa first alarm alas 4:22, samtang gideklarar nga second alarm alas 4:35 sa hapon. Gideklarar kining fire under control alas 5:16 sa hapon.
Ang nasunugang lugar usa ka bodega sa industrial materials.
Base sa inisyal nga impormasyon nga nakuha, adunay nag-welding sulod sa maong bodega apan nabiyaan niya kini, nga posibleng maoy hinungdan sa pagsugod sa sunog.
Naglisod pud ang mga bombero sa pagpalong sa kalayo tungod kay adunay mga kemikal sulod sa bodega nga lisod mapalong, hinungdan nga hangtod pasado alas 7 sa gabii, padayon pa gihapon ang operasyon sa mga bombero. via Bombo Jemmaica Mayot
