LAPU-LAPU CITY, CEBU-Gipanid-an karun sa Kapulisan sa Siyudad sa Lapulapu ang mga bag-ong nakagawas sa prisohan nga drug personalities.
Kini human makadakop ang Kapulisan sa Lapulapu sa usa ka drug personalities nga nakagawas na sa prisohan nga nakuhaan og dul-an sa tunga sa kilong shabu.
Gitino sa Hepe sa City Intelligence Unit sa Lapulapu City Police Office, nga PLt. Col. Joey Bicoy, nga ang mga bag-ong nakagawas sa prisohan maoy angay bantayan kay dali ra kini madani ug mahaylo ilabi na dili kini makakita’g trabaho.
Matud ni Bicoy, kinahanglan mangilabot ang katawhan arun dili mobalik sa ilegal nga kalihokan ang bag-ong gawas sa prisohan.
Subay niini gilusad sa Kapulisan sa Lapulapu nga gipangulohan ni City Police Director, Coronel Elmer Lim ang COPatid kun Community of Peace Alay Trabaho Iwas Droga program arun matabangan nga mahatagan og panginabuhian ang nahilambigit sa kalihokan sa ilegal nga drugas.
