Gisuta sa Bombo Radyo Cebu newsteam ang nagkadaiyang terminal sa dakbayan sa Sugbo, diin sa Cebu South Bus Terminal (CBST), naobserbaran nga dili pa ingun ana ka dagsa ang mga pasahero bisan paman gilaoman na nga karong semanaha, ubay-ubay na unta ang pasahero.
Subay niini, nasusi usab pinaagi sa pakighinabi sa pipila ka indibidwal sa terminal, usa sa ilang nakita nga rason niining kamingaw sa dagsa sa mga byahedor mao ang padayong pagsaka sa presyo sa mga produktong lana.
Hinungdan nga gibutyag sa pipila ka mga drayber nakatino gayud nga mingaw karong tuiga sa Semana Santa, kung ikompara kaniadto sa susamang panahon nga nagdasok na ang mga byahedor atol sa obserbasyon sa Semana Santa.
Samtang nahinabi usab sa Bombo Radyo newsteam si Jubel Sevilla, usa sa mga bus driver sa CBST, diin iyang gikabutyag nga andam na ang mga bus o mga sakyanan nga gamiton sa byahe apan sa karong adlawa, mingaw ang nahimamat nila nga byahedor ug iyang gipanglangtawan nga basin unyang gabii, modagsa na kini.
Gidugang niya nga sa kamingaw sa pasahero karon, adunay pipila nila ka mga bus units nga mobyahe nalang sulod o karga ang 30 lang kabuok pasahero tungod sa kamingaw, busa alang kaniya, iyang napanglangtawan nga sa iyang pagbana-bana, usa sa mga rason sa kamingaw sa mga byahedor karon nunot sa krisis sa panahon.
Sa pikas bahin, iyaha usab nga gibutyag nga niuyon ra usab siya sa pagpahigayon og suprise drug testing gumikan kay alang kaniya naghatag kini og kasiguradohan nga luwas ang mga pasahero.
Kahindoman usab nga gahapong adlawa, Marso 30, nipahigayon usab og surprise drug test ang mga personahe sa regional offices sa Philippine Drug Enforcement Agency (PDEA), Land Transportation Office (LTO), Land Transportation Franchising and Reguatory Board (LTFRB), Philippine Coast Guard (PCG), Philippine National Police (PNP), ug Local Government Units (LGUs).
Diin basi sa datos nga nahipos sa mga awtoridad, sa North Bus Terminal kay nakapa-drug test ang anaa sa 208 ka mga indibidwal diin usa ka taxi driver ang nasuta nga nagpositibo.
Samtang sa South Bus Terminal kay 204 ka mga indibidwal ang nagpa-drug test og walo ang nag-positibo, 3 niini kay mga taxi drivers ug lima ang bus drivers.
