CEBU CITY – Gikompirmar sa Police Regional Office (PRO) 7 nga usa sa missing link sa Parojinog Drug Group ang nasikop sa gipahgayon nga “One-Time Big-Time” operation sa Philippine National Police sa probinsya sa Cebu.
Giila ang nasikop nga si Jurilyn Pegalan, alyas Inday,pinasikad ang search warrant gikan sa Tudela Police Station ug sa pakig-alayon sa Lapu-Lapu City Police Office sa usa ka buybust operation sa Brgy. Tangke, syudad sa Talisay.
Matud sa hepe sa PRO-7 nga si Chief supt. Debold Sinas nga naka-ila lang matud pa ni Alyas Inday ang mga Parojinog isip opisyal sa Ozamis City apan wala niya kini nakaila sa personal base sa nahitabong interogasyon.
Usa sa posibilidad nga gitan-aw karon sa PRO-7 nga nagikan ang shabu sa Ozamis City ug mao karon ang padayon nga giimbestigaran sa kapulisan.
Nasayran nga ang Parojinog Drug Group gipanguluhan sa namatay nga mayor sa Ozamis City nga si Reynaldo Parojinog, nga nalakip usab sa narcopoliticians list ni Presidente Rodrigo Duterte.
Samtang, patay sa managlahing buybust operations sila Parolito Obrero, residente sa Tangke, Talisay City; Eugene Fermin, esidente sa Umapad, Mandaue City ug nakuhaan og gatusan ka mga sachet sa shabu; ug ingon man si Phil John Edison nga taga-Moalboal tungod kay giingong misukol.
Ang pagpahigayon og One-time-big-time operation sa PNP sa probinsya sa Cebu nunot sa pamahayag ni Duterte nga “hotbed sa shabu” ang probinsya sa Sugbo ilabina sa syudad sa Talisay.
