Napalgan ang giingong uniporme sa Chinese military sa Philippine Offshore Gaming Operator (POGO) hub sa Porac, Pampanga nga gironda sa mga awtoridad niadtong miaging semana.
Usa sa narekober nga digital camouflage uniforms nga adunay butones ug initials nga “P.L.A.” nga gisuspetsahan nga nagpasabot sa People’s Liberation Army nga mao ang armadong organisasyon sa Chinese Communist Party ug mao usab ang prinsipal nga pwersa militar sa People’s Republic of China.
Matod sa Presidential Anti-Organized Crime Commission, imbestigahon niini kung aduna bay Chinese military personnel sa Pilipinas nga nagpakaaron-ingnong empleyado sa POGO.
Ang gi-raid nga POGO hub giakusahan nga nakahimog human trafficking, sex trafficking, torture, kidnapping, ug scamming sulod sa 10 ka ektarya nga compound niini sa Pampanga.
Sa dihang gihimo ang operasyon sa miaging semana, 158 ka mga langyaw, kasagaran Chinese, ang naluwas.
Gikompiskar usab sa compound ang mga ekipo nga giingong gigamit sa scamming ug nakit-an usab ang giingong “torture room” ug ebidensya sa torture nga nahitabo sa compound.
Sa miaging semana, usa ka Chinese nga pugante ang nadakpan sa POGO firm nga giingong nagtrabaho isip usa sa mga tortyur sa mga empleyado ug biktima sa kidnapping.
Giila sa mga otoridad ang suspek nga sakop sa mga trabahante nga nakaikyas sa raid sa Pogo hub sa Bamban, Tarlac.
Gituohan usab nga usa ka pugante nga kriminal gikan sa China.
Samtang si Porac Mayor Jaime Capil nipagawas og pamahayag nga siya ang protektor sa POGO firm nga ilegal nga nag-operate.
