Sugdan na sa Bureau of Immigration ang imbestigasyon sa impormasyon nga nibiya na sa nasod ang miangkon nga hitman nga si Edgar Matobato.
Matod sa tigpamaba sa Immigration nga si Dana Sandoval, hangtod karon wala pa nila makompirmar kon nibiya na ba sa nasod ang maong indibidwal.
Kahinumduman nga miangkon si Matobato nga maoy hitman sa giingong Davao Death Squad.
Basi sa report, anaa na kini sa protective custody sa International Criminal Court ug gikatakdang motabang sa imbestigasyon sa International body batok sa giingong duguong war on drugs sa miaging administrasyon.
Una nang gibutyag ni Matobato nga apil siya sa mihimo sa mga pagpatay sukad nga sa kanhi mayor sa Davao City pa kini hangtud nga nahimong kanhi Presidente.
Sa iyang pagtunga sa imbestigasyon sa Senado, siya niingon nga ang Presidential Anti-Organized Crime Task Force sa dakbayan sa Davao maoy responsable usab sa daghang sunod-sunod nga mga pagpatay.
