CEBU CITY-Nasikop na sa kapulisan sa Mambaling Police station nga ginangulohan ni PMajor Efren Diaz Jr. ang gitudlong suspek sa pagpatay ingon man sa paglabay sa patayng lawas sa 22 anyos nga service crew nga si Neca Denice Lagria nga taga lungsod sa Liloan.
Giila ang suspek nga si Jason Cullamat, 30-anyos, minyo, PUJ driver, lumad nga taga lungsod sa Barili probinsya sa Sugbo.
Nadakpan si Cullamat sa hiniusang pwersa sa Mambaling police station ug sa Consolacion Police human nga siya maoy ulahing nakit-an nga gisakyan sa biktima subay usab sa mga pasiunang nakuha nga kasayoran ingon mga CCTV footage nga nahipos sa kapulisan.
Matud pa ni PMajor Diaz nga ilang nasundan ang sakyanan nga gimaneho sa suspek gikan sa Consolacion ug ila dayon kini nga gipahunong.
Ug ilang nakita nga adunay mga lama sa dugo sa luyo ug sa front seat sa maong gimaneho nga PUJ sa suspek nga adunay plate number GXF 570.
Dugang pa nga adunay clutch bag nga nakuha gikan sa suspetsado diin sa sulod niini adunay duha ka gagmay nga pakete sa gituohang shabu ug upat ka garapa sa lana.
Ang amahan sa biktima positibo usab nga giila sa sakyan nga na intercept sa kapulisan sanglit mao kini ang iyang nakita dihang iyang gipasakay ang iyang anak gani nakita usab niya ang dagway sa suspetsado dihang ni lingi kini.
Gihangop sa amahan ang maong pagkasikop sa suspek tungod kay dako ang iyang pagtuo nga mao kini ang nipatay sa iyang anak.
Sa habig sa suspek hugot niini nga gihimakak ang pasangil og namahayag nga ni li siya sa lungsod sa Barili dihang nahitabo ang insidente samtang aduna siyay gitudlo nga laing tawo nga nagmaneho sa maong sakyanan diin mao ang iyang uyoan.
Nagpadayon karon ang imbestigasyon sa kapulisan sa maong insidente.
