CEBU CITY – Patay ang duha ka lalaki atol sa pagsilbi sa warrant og arrest nga gipahigayon sa Provincial Intelligence Branch (PIB) sa Brgy. Basak San Nicolas dakbayan sa Sugbo.
Ang napatay mao si Gerly Luwage, hingkod ang pangidaron kinsang subject sa operasyon, samtang ang kauban niini mao si Junel Lasam, hingkod ang pangidaron ug parehong nagpuyo sa Sitio Crusher Brgy. Lawaan III dakbayan sa Talisay.
Matud ni Police Capt. Alejandro Batobalonos, ang hepe sa PIB, nga dugay na nila nga gipangita ang subject nga si Luwage sanglit mao kini ang Top 1 Most Wanted sa Talisay sa illegal drugs.
Dugang pa ni Batobalonos nga si Luwage ang bininlan sa inilang drug personality nga si Steve Go kinsang napatay sulod sa Mandue City Jail sa nakalabay nga tuig. Kini matud pa ang nakasunod sa mga lihok ni Steve Go sa negosyo sa iligal nga drogas ug nakasunod usab sa mga property niini.
Nag-abang si Luwage sa Brgy. Basak San Nicolas tungod kay nagtago-tago na kini ug nagpaila nga dunay piggery, sigon sa tag-iya sa gi-abangan niini nga balay.
Sigon usab ni Batobalonos nga wala sila makaagi sa main door sa balay ug milipot pa kini sila sa luyo tungod kay misukol ang duha og misangpot sa pinusilay ang naasoy nga operasyon.
Nasakmit sa maong operasyon ang 200 ka gramos sa shabu nga mikantidad og P1.3 million.
Samtang ang napatay nga si Lasam nasayran nga mao ang trustee ni Luwage. (FDP/GN)
