MANDAUE CITY,CEBU- Gibana-bana nga anaa sa ₱100,000 ang gikawat sa usa ka botika sa Barangay Jagobiao, dakbayan sa Mandaue, karung adlawa June 3, 2025.
Kini ang gitino ni Police Lieutenant Colonel Mercy Villaro, tigpamaba sa Mandaue City Police Office, nga ang kwarta gikuha gikan sa vault sa tindahan, nga adunay sulod nga halin sa usa ka adlaw.
Dugang pa ni Villaro nga misuway usab og guba ang mga suspek sa ATM machine sulod sa botika apan napakyas.
Sa CCTV footage gikan sa sulod sa establisemento makita ang tulo ka mga lalaki nga nagtaptap sa ilang mga nawong nga nisulod.
Sa pagkakarun, wala pa matino sa kapulisan ang mga suspek sa naasoy nga panghitabo, apan wala usab nila gisalikway ang Inside job.
Ang mga kawatan miagi sa bongbong sa pharmacy human nga gibuslotan kini agi sa bakanteng lote nga tupad ra usab sa building nga nahimutangan sa pharmacy.
Usa ka representante sa pharmacy nga padulong na unta nga mangabli sa pharmacy kaganihang buntag ang nakadiskobre sa hitabo alas 5:50 kaganihang kadlawon.
Nataho ang insidenti sa kapulisan alas 7:10 na sa buntag.
Pipila ka mga silingang residenti sa building mibutyag nga nakadungog sila ug pagtagiktik sa dapit sulod sa milabay nga adlaw apan wala ra manumbaling sa pagtuo nga adunay gitrabaho sa building.
Aduna usay higayon nga magpaghot ang ilang iro magabie.
Nasayran usab nga ang bakanteng lote mga usa ka buwan na nga naabli human giguba ang pultahan niini sa wala pa matinong rason.
Giingong dugay na unta kini nga gikoral sa tuyo nga walay makasulod-gawas sa maong luna.
Sa pagkakaron, ang Mandaue City Police nagpahigayon sa ilang imbestigasyon aron mailhan ang mga suspetsado ug masusi ang tanang anggulo sa insidente.
