CEBU – Gironda sa mga sakop sa Women and Children Protection Desk sa Police Regional Office-Central Visayas sa pakig-alayon sa Department of Social Welfare and Development-Central Visayas, Cebu City Police Office ug Department of Justice ang usa ka gituohang balay nga gihimong cybersex den sa Barangay Luz, Miyerkules, Hulyo 13, 2022.
Gidakop sa mga awtoridad ang usa ka ginang (ngan gipugnga) ug malampuson nga na-rescue ang mga batan-on nga nagpangidaron og 17 anyos paubos, diin sila ang gibugaw sa ilang inahan nga maghubo atubangan sa camera bugti sa dakong bayad gikan sa langyaw nila nga customer.
Apan sa eksklusibong pakighinabi sa Bombo Radyo Cebu sa usa sa mga anak sa suspek nga si Christian Suson, nagkanayon kini nga wala kini masayod sa tibuok panghitabo gumikan gipukaw lang kini dihang nahitabo ang pagpang-raid.
Gihimakak ni Soson nga gibugaw sa iyahang inahan ang iyahang mga manghud gani gibutyag niini nga picture lang ang gihuptan sa otoridad og wala kini saktong ebidensya aron mapatud-an ang maong ilegal nga buluhaton.
Naghinaot nalang kini nga mauli sa ilaha ang iyahang tulo ka menor de edad nga mga manghod.
