CEBU CITY – Gikumpirmar ni Police Senior Supt. Manuel Abrogina, ang hepe sa Cebu City Police Office (CCPO) nga nalakip ang pangalan ni PO3 Jonathan Yaun Tilos sa listahan sa mga drug personality nga nalambigit sa iligal nga drogas.
Kini subay na sa pagbanhig patay ni Tilos gahapong adlawa sa Sitio Malbog, Barangay Poblacion, lungsod sa Alegria, probinsya sa Sugbo sa wala pa mailhi nga suspetsado.
Matud ni Abrogina nga padayun pa ang ilang lawum nga imbestigasyon ilabi na sa pagsuta kung si kinsa ang nakabangi sa maong pulis sa wala pa mahitabo ang maong insidente.
Samtang sa habig usab sa kaparyentehan ni Tilos, partikular na ang kababata niini, wala sila makatuo sa nadangatan ni Tilos gumikan nga usa man kini ka buotan nga tawo ug gani dili kini bisyoso.
Gidepensahan usab niini ang pagkalambigit sa iligal nga drogas ni Tilos diin matud pa dili tinuod sanglit istrikto man ang maong pulis sa maong hisgutanan diin gani mamadlong kini sa mga kabatan-unan sa ilang dapit nga musuway o mugamit sa maong ginadili nga butang.
Nasayran nga klasmate ni Tilos sa Panglao Diwa Batch 2005-2006, ang bag-ohay palang nga napatay nga pulis sa gipahigayun nga buybust operation nga si Police Inspector Reymund Hurtezuela.
