Gisaway sa Partido Demokratiko Pilipino-Lakas ng Bayan (PDP-Laban) niadtong Huwebes, Pebrero 20, si Senate Minority Leader Koko Pimentel sa paggamit sa ngalan sa partido sa iyang suwat nga nag-awhag sa Senado nga aksiyonan ang impeachment complaint batok kang Bise Presidente Sara Duterte.
Si Pimentel nisuwat ngadto kang Senate President Francis Escudero, nga nagkanayon nga kinahanglang aksyonan dayon sa Senado ang mga articles of impeachment nga gipasa sa House of Representatives.
Sa ulohan sa suwat, si Pimentel nagpaila nga sakop sa PDP-Laban. Apan, ang partido nabahin ngadto sa duha ka factions nunot sa dili pagsinabtanay sa baruganan ni kanhi Presidente Rodrigo Duterte sa West Philippine Sea ug sa mga alegasyon sa korapsyon sa gobyerno.
Gikondena sa paksyon nga gipangulohan ni Duterte ang paggamit ni Pimentel sa ngalan sa partido, tungod kay nipabor na kanila ang Commission on Elections labot sa kasungian sa liderato sa partido.
Apan si Senate Minority Leader Pimentel, niinsistir nga kinahanglang unahon sa mga kaubanang senador ang pagsugod sa impeachment trial ug dili ang pagpangampanya alang sa 2025 elections.
Dugang pa niini nga kinahanglang molihok ang Senado tungod kay kabahin kini sa ilang gipanumpaan nga katungdanan.
