CEBU CITY — Gipangita sa kapulisan ang usa ka lalaki kinsang gituohang nangawat og upat ka mga motorsiklo ug gipangbaligya sa bukirang bahin sa lungsod sa Barili, Cebu.
Matud ni Police Master Sergeant Mark Anthony Fat sa Barili Police Station nga natumbok nila ang gituohang kawatan apan dili una nila hinganlan gumikan kay nagpadayon pa man ang operasyon.
Base sa taho gikan sa usa ka concerned citizen, gibaligya sa maong lalaki ang mga kinawat nga motorsiklo sa presyo nga hangtud sa P10,000 apan napalit na kini nga walay igong papeles.
Dugang pa ni Fat nga i-apas na lang, matud pa, ang mga dokumento ngadto sa mga nakapalit sa motor.
Gibantayan usab sa kapulisan ang mga lakaw sa wala mailhing kawatan alang sa pagkasikop niini.
Sa pagkakaron, nakig-alayon ang Barili Police Station sa mga kasikbit niining municipal police stations alang sa ilang nagpadayong operasyon batok sa giingong nagkawat sa mga motorsiklo.
