CEBU CITY — Nabalhog sa prisuhan ang usa ka high value target nga drug suspect human kini nakuhaan og P13-milyones nga balor sa ginadiling drugas atol sa gipahigayong buybust operation sa Brgy. Cogon Ramos, dakbayan sa Sugbo.
Gisikop sa mga sakop sa PNP ug PDEA ang subject nga si Rico Rubi, 19 anyos, ug nagpuyo sa Brgy. Labangon, sa susamang dakbayan.
Nasakmit sa mga otoridad ang duha ka kilo sa shabu nga nagkantidad og P13.6-milyones gikan ni Rubi, kinsang gituohang myembro sa usa ka drug syndicate.
Matud sa hepe sa Fuente Police Station nga si Police Major Eduard Sanchez nga gibaligya ni Rubi ang ginadiling drugas online.
Dugang pa ni Sanchez nga posibleng nalambigit na daan ang dinakpan sa ginadiling drugas sa sayong pangidaron.
Nasayran nga anaa sa bilangguan ang amahan niini tungod sa pagpakiglambigit sa ginadiling drugas.
Mag-atubang si Rubi og kasong kalapasan sa Republic Act 9165 o Comprehensive Dangerous Drugs Act of 2002.
Samtang gi-angkon ni Cebu City Police Director Colonel Gemma Vinluan nga walay hubas-hubas ang drugas sa dakbayan.
Gihimug-atan niini nga angayang manginlabot ang publiko sa tinguha nga masulbad ang problema sa ginadiling drugas, ingon man usab sa kaluwasan sa komunidad.
Nakita usab ni Vinluan nga mahimong na-burnout ang mga edaran nang mga durugista hinungdan nga mga nalambigit ang mga batan-on sa ilegal nga drugas.
Kahinumduman nga naninguha ang bag-ong City Police Director nga makakuha ang iyang mga sakop og sinako nga shabu sa tinguha nga masulbad ang problema sa ginadiling drugas sa dakbayan.
