PROVINCE OF CEBU- Mipadayag og tumang kasubo si Cebu Governor Pamela “Pam” Baricuatro sa makaluluoy nga kamatayon sa usa ka inahan ug sa iyang bag-ong nahimugso nga anak, nga gikatahong gibalibaran sa cesarean section sa Carcar Provincial Hospital.
Giingong ang inahan nga hapit na manganak gi-refer pa sa laing pasilidad apan namatay uban sa iyang masuso samtang nagpadulong paingon sa Talisay District Hospital.
Ang maong panghitabo nakapukaw sa kabalaka ug kasuko sa publiko, hinungdan nga gilusad dayon sa Kagamhanan sa Probinsiya sa Sugbo ang usa ka hingpit ug transparent nga imbestigasyon aron masuta ang tinuod nga nahitabo.
Sa usa ka pahayag, nanawagan si Gobernador Baricuatro og pagsabot gikan sa publiko ug gipasiugda nga sa iyang 23 ka adlaw sa katungdanan, nihimo na siya og mga lakang aron mapalambo ang serbisyo medikal sa probinsya.
Lakip sa mga aksyon nga iyang gihimo mao ang pagpagawas og pondo alang sa mga district hospital aron mapalit ang mga importanteng tambal ug suplay, ug ang paspas nga pag-hire sa mga medical professional aron pun-an ang kakulangan sa mga hospital.
Nahinabi sa Bombo Newsteam si Roland Robusto, igsuon sa bana sa biktima, diin iyang gisaysay nga gikan pa lamang sila sa ilang pinuy-anan sa Argao, wala dayon nakalakaw ang pasyente tungod kay kinahanglan pa nga duha ang pasyente nga sakay sa ambulansiya aron kini molarga.
Gidugang ni Robusto nga dako gyud ang kasakit nga ilang gibati sa nahitabong trahedya, hinungdan nga nanawagan sila og hustisya.
Matud niya, gipasa-pasa pa sa tulo ka mga ospital ang inahan, nga ilang gibati nga usa sa mga rason sa pagkamatay niini.
Gihatagan niya og gibug-aton nga kung nakadesisyon lang unta dayon ang Bogo Argao Provincial Hospital ug ang Carcar Provincial Hospital nga ibalhin ang pasyente ngadto sa mas dako nga ospital, dako pa unta ang posibilidad nga buhi pa ang mag-inahan.
