PROVINCE OF CEBU-Nipasidaan si Gobernador Gwendolyn Garcia nga limitahan nalang sa lima ka kilo ang timbang sa mga costumes sa festival queens sa umaabot nga Pasigarbo sa Sugbo 2023.
Usa kini sa mga nahisgutan atol sa ilang panagtapok kauban ang mga mayor sa kasikbit nga dakbayan, choreographers, ug tourism officers niadtong Hulyo 13.
Sigon ni Garcia, subli niyang nabantayan nga mag-agwanta ang mga festival queens sa ilang pagsayaw tungod lang sa gibug-aton sa ilang mga costumes.
Saysay usab sa mga choreographers nga muabot sa 10 – 15 ka kilo ang kasagaran nga costumes sa mga niaging tuig.
Tungod niini, misugyot si Garcia nga kinahanglan mangita og paagi ang mga designers nga mogaan ang mga costumes sama sa paggamit og mga lightweight materials.
Nagkanayon usab ang gobernador nga usa kini ka hagit nga nindoton gihapon sa mga designers ang paggama sa costumes nga dili magsakripisyo ang mananayaw.
Lakip sa mga natuki sa maong tigom ang mga guidelines nga hingpit nga tumanon sa tanang contingents sama sa pagdili sa pag-usab og costumes sa street dancing, gidugayon sa ritual showdown, ug ang pagdili sab sa pag-apil og mga performers nga moubos sa 5-anyos.
Gikatakda nga ipahigayon ang Pasigarbo sa Sugbo 2023 karong umaabot nga Agosto 27 diin muabot sa 50 ka contingent ang mopasudayag sa ilang mga nagkalain-laing festivals.
