Giwagtang sa Malacañang ang kahadlok ni Bise Presidente Sara Duterte nga adunay hulga sa kinabuhi ni kanhi Presidente Rodrigo Duterte.
Kini human gikuwestiyon sa Palasyo ang pamahayag ni Bise Presidente Sara Duterte nga posibleng masusama ni Ninoy Aquino ang posibleng dangatan ni kanhi Presidente Rodrigo Duterte kon mobalik kini sa nasod.
Matod ni Claire Castro, dili ikumpara si Duterte kang Aquino, tungod kay si Aquino walay record sa mass murder o crimes against humanity.
Dugang pa ni Castro nga base sa nangaging mga pakigpulong ni Duterte, wala niya ikumpara ang iyang kaugalingon kang Ninoy Aquino, kondili kang Adolf Hitler, diin niingon siya nga “kung ang Germany adunay Hitler, ang Pilipinas adunay Duterte.”
Gikwestiyon usab ni Castro kung asa gibunlot ni VP Sara ang estorya nga adunay hulga sa kinabuhi sa kanhi Presidente.
Apan hangtod karon, bisan ang giingong hulga sa kinabuhi sa Bise Presidente wala pa mapresentar ngadto sa NBI ug PNP.
