CEBU CITY-Nasagmuyo ang atleta gikan sa National Capital Region sa kompetisyon nga 2,000 meter walk race human kini nakalangkat sa gold medal podium finish nga gituohan niining usa ka ‘Record Breaking’ apan, dili i-recognize sa National Technical Committees mahitungod sa isyu sa gitas-on sa track oval sa Cebu City Sports Center (CCSC).
Sa pakighinabi sa Bombo Radyo Cebu sa atleta nga si Gabriel C. Cervantes, kinsa nga represante sa NCR Metro Stars sa Secondary Men’s Division 2000-meter walk race, gisayangan kini sa kahigayon nga makuha unta niya ang ‘Palaro record’ sa iyang kompetisyon apan dili kini mahimong opisyal tungod sa isyu sa venue.
Gipa-ambit pa niini, nga niadtong 2023 Palarong Pambansa sa Marikina City, na-disqualify siya tungod na foul nga gi-flag sa race committee hinungdan nga naninguha kini sulod sa usa ka tuig aron mabawi ang pangandoy nga makadaug sa Palaro.
Kahinumduman nga gisalikway usa sa National Technical Committees ang mga record breakers sa running competitions sa Palaro mahitungod sa isyu nga adunay kalabutan sa standard size rubberized track oval sa CCSC.
