CENTRAL VISAYAS- Malampusong nadepensahan ni Jhul Ian G. Cañalita ang iyang korona sa Secondary Boys 5,000-meter run sa Palarong Pambansa 2026, hinungdan nga mas nailhan siya karon isip “Golden Boy of Bohol.”
Ang 17-anyos nga atleta gikan sa Bohol mipadayon sa iyang dominasyon sa long-distance running human masakmit pag-usab ang bulawang medalya sa nasudnong kompetisyon.
Sa pakighinabi sa Bombo Radyo Cebu, gibutyag ni Cañalita nga wala siya moundang sa pag-ensayo sukad sa miaging Palaro diin nakadaog usab siya og duha ka gold medals ug nakatala og duha ka rekord.
Matod pa niya, magsugod siya sa pag-ensayo sa alas-4 sa buntag hangtod alas-6, dayon mosulod dayon sa klase.
Bisan gikapoy sa pagbalanse sa pag-eskwela ug pag-ensayo, iyang giingon nga ang iyang pangandoy maoy naghatag kaniya og kusog aron magpadayon.
Gipaambit usab niini nga nagsugod siya sa pagdagan sukad Grade 3 pa siya ug karon usa na sa mga labing promising nga long-distance runners sa Central Visayas.
Gidugang niini,nga consistent training, endurance, ug focus maoy yawe sa iyang sunod-sunod nga kadaugan.
Gibutyag usab niya nga posible niyang mabuak ang iyang kaugalingong rekord sa 5,000-meter run base sa iyang relo, diin naka-oras siya og 15 minutos ug 15 segundos kumpara sa 15 minutos ug 16 segundos sa miaging tuig; apan, gihulat pa ang opisyal nga resulta.
Bisan wala ubani sa iyang mga ginikanan atol sa kompetisyon sa Agusan del Sur, nagpabilin siyang determinado sa pagpadayon sa iyang nasugdan sa sports.
Sunod niyang target ang 3,000-meter steeplechase diin naglaom siyang makadugang pa og medalya alang sa Central Visayas delegation.
