Gisalikway ni Cebu Governor Pam Baricuatro ang mga pasangil nga siya ang nagpaluyo sa suspensyon ni Mayor Rajiv sa Minglanilla, dungan sa pagbutyag nga aduna na usab siya’y nadawat nga seryosong hulga sa iyang kinabuhi.
Matud sa Gobernador Baricuatro, ang maong mga pasangil sa social media usa lamang ka “demolition job” gikan sa iyang mga kaatbang sa politika aron gub-on ang iyang relasyon sa mga mayor ug bungkagon ang kalig-on sa probinsya.
Apan, iyang gihatagan og katin-awan ang mga pagduda pinaagi sa pag-ingon nga wala siyay motibo nga dauton ang usa sa iyang labing maayo nga mayor tungod kay ang kagubot sa pagdumala makabalda lang sa serbisyo alang sa mga Sugboanon.
Subay niini, gihangyo ni Baricuatro ang publiko ug ang mga lokal nga opisyal nga dili magpadala sa mga tabi-tabi ug “malignant whispers” nga walay igong basehan,ug nipahinomdom nga ang kalampusan sa matag mayor mao usab ang kalampusan sa tibuok Sugbo, hinungdan nga gikinahanglan ang panaghiusa ug kooperasyon imbes nga maminaw sa mga intriga.
Sa pikas bahin, seryoso usab nga gibutyag sa Gobernadora ang nadawat nga intelligence report bahin sa usa ka “killer” gikan sa Mindanao nga gibayran matud pa og minilyon ka pesos aron siya mapatay.
Diin siya nagtoo nga kon dili siya maguba sa iyang mga kaaway pinaagi sa mga bakak nga istorya, ang pagtuldok na sa iyang kinabuhi ang sunod nga target niini.
Tungod niini, nangayo siya og pag-ampo ug padayong suporta gikan sa katawhan samtang nakigtambayayong siya sa mga awtoridad alang sa iyang seguridad ug sa pagkab-ot sa hustisya.
