PROVINCE OF CEBU- Gitugotan na karon ang mga pasahero nga gikan sa habagatang bahin sa probinsya sa Sugbo nga mupanaug sa mga designated bus stops duol sa mga unibersidad sa Dakbayan sa Sugbo.
Kini human sa hangyo ni Gobernadora Pamela Baricuatro kang Cebu City Mayor Nestor Archival nga usbon ang point-to-point policy sa syudad alang sa mga pampasaherong bus.
Nagpasalamat si Gob. Baricuatro kang Mayor Archival sa iyang pagsugot nga ang mga bus gikan sa habagatan sa lalawigan tugotan na nga makahunong sa mga eskwelahan sulod sa hurisdiksyon sa Cebu City.
Gibuhat kini aron dili na maapektuhan ang mga estudyanteng gikan sa probinsya, nga naapektohan sa pagpanakop sa mga traffic enforcers batok sa mga bus nga mupahunong, mupasakay, o mupanaug og pasahero gawas sa South Bus Terminal.
Una niini, si Mayor Archival nangayo og pagsabot sa publiko sa higpit nga pagpatuman sa “no dropping” policy alang sa mga provincial buses.
Nipasabot siya nga kabahin kini sa mga paningkamot sa pagpalambo sa trapiko sa dakbayan.
Kini nga pahayag misunod sa daghang reklamo nga gipost sa mga lungsoranon nga naapektohan sa maong palisiya, nga karon hugot nga gipatuman sa Land Transportation Franchising and Regulatory Board (LTFRB).
