Tutokan ni Cebu Governor Pamela Baricuatro, ang bag-ong gitudlo nga Chairman sa Regional Development Council (RDC) 7, ang natad sa imprastraktura, pagpalambo sa ekonomiya ug pagpalig-on sa mga sistema sa panglawas isip sentro sa iyang tulo ka tuig nga termino sa RDC.
Atol sa iyang inaugural address niadtong Huwebes, Disyembre 4, 2025, sa Social Hall sa Provincial Capitol, gilatid ni Baricuatro ang iyang plano alang sa sunod nga tulo ka tuig, nga nagpasiugda sa iyang tulo ka pangunang prayoridad.
Sigon ni Baricuatro, nga ang iyang mga prayoridad nahiuyon sa epekto sa magnitude 6.9 nga linog sa amihanang Cebu niadtong Septyembre ug sa bagyong Tino niadtong Nobyembre nga hinungdan sa kaylap nga pagbaha. og miresulta sa dakong kadaot sa mga nag-unang sektor sa ekonomiya, labi na ang turismo, pamatigayon ug paggama.
Misaad usab kini nga palamboon ang kolaborasyon sa tanang sektor ug rehiyon aron mapalambo ang evidence-based planning ug decision-making.
Sa ulahing bahin sa Oktubre, gitudlo ni Presidente Ferdinand Marcos Jr. si Baricuatro isip Chairman sa RDC 7, ang pangunang policy-making ug coordinating body alang sa regional development sa Central Visayas.
Nagsilbing usa ka importanteng plataporma ang RDC diin ang mga local government units, mga representante sa pribadong sektor ug uban pang mga hingtungdan magtinabangay aron magplano ug magpatuman sa mga programa ug polisiya sa kalamboan sa tibuok rehiyon.
Pormal nga milingkod si Baricuatro sa katungdanan atol sa miting sa RDC 7 niadtong Huwebes.
