CEBU PROVINCE-Mobisita sa South Korea si Cebu Governor Gwendolyn Garcia karong buwana aron motambong sa 8th East Asia Tourism Forum (EATOF) sa Gangwon Forestry Exhibition Federation sa South Korea.
Gikompirmar ni Garcia ang iyang pagbisita sa dihang nakigtagbo siya kang EATOF Secretary General Jun Tae Hyeon sa Kapitolyo niadtong Miyerkules, Agosto 30.
Magsugod ang tulo ka adlaw nga forum sa Septiyembre 21 ug tukion ang nagkadaiyang isyu ug hagit nga giatubang sa sektor sa turismo sa rehiyon.
Kini maghisgot sa mga isyu nga may kalabotan sa kalambuan tali sa mga probinsiya nga sakop sa EATOF.
Ang EATOF natukod kaniadtong 2000 sa Gangwon.
Usa kini ka boluntaryong asosasyon nga motabang sa mga lokal nga kagamhanan sa East Asia region sa pagpalambo sa industriya sa turismo.
Ang mga sakop nga probinsya niini naglakip sa Sugbo; Jilin, China; Gangwon, S. Korea; Sarawak, Malaysia; Yogyakarta, Indonesia; Tottori, Japan; Luang Prabang, Laos; Tuv, Mongolia; Siem Reap, Cambodia; ug Quang Ninh, Vietnam.
Niadtong 2010, si Garcia mitambong sa EATOF nga gipahigayon sa Quang Ninh province sa Vietnam.
Niadtong Septembre 2011, ang kalihokan gipahigayon sa wala na karon nga Cebu International Convention Center sa Mandaue City.
