CEBU PROVINCE-Niinsister si Cebu Gobernador Gwendolyn Garcia nga ang Kagamhanan sa Probinsiya sa Sugbo adunay katungod nga mangayo og bayad gikan sa Department of Public Works and Highways sa Central Visayas (DPWH) 7 tungod sa paggamit niini sa kabtangan.
Una nang nasuta nga ang DPWH migamit sa 42,615 square meter nga bahin sa Capitol lot sa Osmeña Boulevard sa dakbayan sa Sugbo.
Gianunsyo ni Garcia sa Biyernes, Hulyo 21, 2023, nga iyang nabasa ang memorandum nga gipirmahan ni Undersecretary Anne Sharlyne Lapiz, diin gitumbok nga dili mobayad ang DPWH sa mga dalan nga sakop sa proyekto sa gobyerno.
Ang undersecretary niangkon nga ang Kapitolyo nagsilbi lang nga “trustees” o tinugyanan sa maong mga dapit.
Apan gipasabot sa mga abogado sa Kapitolyo nga ang mga karsada paingon sa Cebu Provincial Capitol gipalit sa probinsiya gikan sa pribadong kompanya niadto pang dekada 1930, ug aduna kini mga titulo nga nagpamatuod nga ang maong mga kabtangan iya sa probinsiya.
Gipalit sa Kapitolyo ang nahisgutang yuta gikan sa Cebu Heights Company Inc. tungod kay gusto niini nga ibalhin ang edipisyo ngadto sa mas dakong lugar.
Base sa panukiduki sa Cebu Provincial Engineering Office, 20 metros lang ang luna nga gigahin alang sa pampublikong dalan.
Apan, gidugangan sa DPWH ang gilapdon sa matag kilid sa karsada og duha ka metros, nga nagdala sa kinatibuk-ang gilapdon sa mga dalan nga gigamit niini ngadto sa 24 metros.
Gikataho nga ang bahin sa Osmeña Boulevard ug N. Bacalso Avenue nga gipanag-iya sa Kapitolyo maoy gamiton sa pagtukod sa mga bus rapid transit (BRT) stations.
