CEBU CITY — Mipahibalo si Cebu Governor Gwendolyn Garcia nga walay planong istriktuhon ang border controls tali sa dakbayan sa Sugbo ug sa mga kasikbit nga lugar sa probinsya.
Unang gihangop sa gobernadora ang nahimong lakang ni Cebu City Mayor Edgardo Labella ang pagpahugot og balik sa mga border controls aron masulbad ang nagkasakang mga kaso sa COVID-19 sa dakbayan.
Gipasalamatan ni Garcia si Labella gumikan sa maong lakang aron dili usab mokuyanap og samot ang makamatay nga kagaw sa mga kalungsuran ug syudad sa Cebu province.
Gihimug-atan sa gobernadora nga dili una istriktohon ang mga border controls sa mga kalungsuran ug syudad sanglit hinayhinay nga mibangon ang probinsya human natagamtaman ang pagkahagba sa ekonomiya nga dala sa coronavirus crisis.
Sa pagkakaron, nagpabilin sa modified general community quarantine ang probinsya sa Sugbo ug usa sa mga nahimong lakang sa provincial government mao ang pagpalambo sa local tourism nga mao ang yawi aron molambo pagbalik ang ekonomiya.
