PROVINCE OF CEBU-Gibasura sa Kagamhanan sa Probinsiya sa Sugbo ang governor’s permit sa pipila ka private tour operators sa Kawasan Falls sa lungsod sa Badian, habagatang kasadpan sa Sugbo human masayri nga pipila lang sa mga negosyo ang narehistro sa Bureau of Internal Revenue (BIR).
Gilatid usab sa gobernador ang mga termino sa iyang pag-takeover sa canyoneering operations sa Kawasan, ug mideklarar og subsidy alang sa mga tour guide sa lungsod nga apektado sa pagsira sa falls.
Kini ang gipahibalo ni Gobernador Gwendolyn Garcia atol sa usa ka stakeholders meeting uban sa mga private tour operators, tour guides ug mga opisyal sa gobyerno niadtong Miyerkules, Hunyo 21, 2023 sa Badian Municipal Gym.
Gitino ni Garcia nga kabahin kini sa inisyatiba sa Kapitolyo sa pag-regulate sa canyoneering operations sa sikat nga tourist attraction sa dili pa kini ablihan og balik sa publiko sa higayon nga mahuman na ang restoration effort.
Nasayran nga dungan sa pag-restore sa Kawasan Falls, ang Kapitolyo na usab ang mopuli sa ilang administrasyon, apil na ang pagtakda og mga regulasyon kon pila ang ibayad sa mga turista alang sa canyoneering adventures ug ang kompensasyon nga kinahanglang bayran sa pribadong tour companies sa ilang mga guide.
Kinahanglan usab karon ni Garcia ang mga tour guide nga mabansay ug accredited sa Department of Tourism (DOT).
