CEBU CITY-Mipahimangno si Gov. Gwen Garcia ngadto sa mga Bus Operators ug mga Pasahero nga striktong ginadili ang pag-pick up og mga pasahero gawas sa Cebu South Bus Terminal.
Kini human, adunay pipila ka mga Bus ang nakit-an nga mopasakay sa ug pasahero sa gawas sa maong terminal.
Subay niini, gitino ni Carmen Quijano, manager sa CSBT ug CNBT, nga iyahang gihangup ang maong pahimangnu sa Gobernadora, kini gumikan kay delikado kini ug lagmit maaksidente ang mga pasahero nga mosakay sa bus nga nagdagan tunga sa dalan.
Dugang pa, nga makamugna usab kini og grabeng trapik tungod kay mopahinay man ug padagan ang bus o magtambay pa sa kilid sa Natalio Bacalso Ave. aron pasakyon o maghuwat og mga pasahero.
Gitino ni Quijano, nga iyaha ning gipangusgan kini gumikan kay ang Probinsya sa Sugbo naningkamot nga adunay kabutangan og tarong, hapsay, ug hamugaway nga Bus Terminal ang mga mobyahe paingon sa Habagatang Sugbo.
Gitataw pa niini, nga iyaha usab nga gipanglantawan ang kaluwasan sa mga pasahero, ug unta maminaw ang katawhan arun sa ingun walay aksidente nga mahitabo.
Kung kahinumduman, nga adunay nakuha nga hulagway kuha sa CCTV nga gibutang sa gawas Cebu South Bus Terminal ang ubang violators nga gi-report na sa pamunoan ngadto kang Gov. Garcia atol sa Department Heads’ Meeting.
