CEBU CITY — Mibahad si Cebu Provincial Governor Gwendolyn Garcia nga mopasaka og kaso batok sa usa ka grupo sa mga homeowners sulod sa usa ka subdivision sa Bogo City kinsang misaway ngadto sa mga medical frontliners.
Kini human nga gisaway sa gobernadora ang petisyon sa Solid Homes Subdivision nga dili nila pasudlon ang mga doktor ug nurses sa Cebu Provincial Hospital sa Bogo nunot na sa ilang kabalaka nga mokatap ang makamatay nga coronavirus disease.
Matud ni Garcia nga si ABC President Celestino “Tining” Marquez mismo ang nisumbong ngadto sa gobernadora kalabot sa sitwasyon sa mga frontliners.
Hinungdan nga hilabihang naguol si Garcia sa kapalaran sa mga medical frontliners sanglit gibutang sa peligro ang ilang kinabuhi aron lang masumpo ang COVID-19.
Matud sa gobernadora nga kung mograbe pa ang petisyon sa mga homeowners, magpadala kini og mga sakop sa kapulisan ug ipadakop.
Dugang pa nga bahad ni Garcia nga siya mismo ang mokiha sa korte batok sa maong grupo.
