CEBU CITY — Imbestigaran ni Cebu Provincial Governor Gwendolyn Garcia kung nganong nakasulod ang coronavirus disease o COVID-19 sa Cebu Provincial Detention and Rehabilitation Center (CPDRC).
Kini human nga natakdan sa coronavirus ang 18 ka mga inmates sa CPDRC, base na sa report gikan sa Department of Health (DOH)-7.
Matud ni Garcia nga wala giseryoso ang kamanduan niini nga kinahanglan unang magpuyo sa CPDRC ang mga empleyado, lakip na ang jail guards.
Gibutyag sa gobernadora nga adunay CPDRC employee ang mag-ulian pirmi sa Sambag II, sa dakbayan sa Sugbo ug nakita nga nagpositibo kini sa coronavirus.
“So kani ato ni tan-awon. We are trying to see kay kay wa man tay dalaw, wa man tay pasa pasa og pagkaon or supplies. Kadto na lang. I feel that is the weak point kay wa tohoa ang akong order,” dason pa sa gobernadora.
Gipaubos na sa isolation ang nahisgutang mga piniriso human nabantayan nga adunay mga flu-like symptoms.
Gi-andam nang daan sa provincial government ang duha ka mga isolation rooms ug gi-atiman kini sa usa ka doktor.
Nasayran usab nga gipatuman nang daan sa prisuhan ang no visitation policy, lakip na ang pagdunol-dunol niadto pang Marso.
Samtang gikumpirmar sa gobernadora nga nagagikan ang tagsa-tagsa ka mga bag-ong kaso sa COVID-19 gikan sa Pakigne, Minglanilla ug sa Daanbantayan.
Giduso na usab sa gobernadora ang pagpahigayon og maasive target testing gamit ang mga swab samples, imbes nga rapid mass testing.
