Gikumpirma ni South Cotabato Governor Reynaldo S. Tamayo Jr. nga ang nahitabong pagpamusil sa Banga National High School sa Banga, South Cotabato, Biyernes sa hapon, September 18, 2026, kay usab ka “isolated case”.
Base sa mga paunang impormasyon nga nakalap sa mga otoridad gikan sa disaster team ug sa kapolisan, lima ka mga kabataan ang naapektuhan sa maong insidente, diin upat kanila ang nag-antus sa mga samad samtang ang usa nga mao ang suspetsado ang nagpusil sa iyang kaugalingon human gipusil ang iyang mga kauban.
Hinuon, padayon pa nga gipagawas sa mga otoridad ug kapolisan ang ilang pinal nga opisyal nga report bahin sa eksaktong talaan sa mga biktima ug sa ilang kahimtang sa ospital nga sa pagkakaron gidala sa nagkadaiyang pasilidad.
Napadayag usab sa gobernador nga base sa paunang pakighinabi sa best friend sa suspetsado, nasayran nga membro kini sa gitawag nga “True Crime Community” o online group.
Tungod niini, gisugo na ni Governor Tamayo ang kapolisan nga palawman ug imbestigahan pag-ayo ang maong grupo ug kon unsa ang nakaimpluwensya sa bata aron makasulod niini nga matang sa komunikasyon sa internet.
Gidugang pa ni Tamayo nga bug-at kaayo sa iyang pamati ug nagsubo siya pag-ayo isip amahan sa lalawigan nga nahitabo kini nga trahedya sulod sa usa ka eskwelahan nga ginapunduhan man unta sa provincial government og security guards.
Tungod sa maong sitwasyon, nipadangat og pahimangno si Governor Tamayo, ug nag ingun nga kinahanglang mahimong responsable ang mga ginikanan, itago ang mga pusil ug dili gayud itugot nga makit-an o dali nga ma-access kini sa ilang mga anak.
