CEBU PROVINCE-Gimando ni Cebu Provincial Governor Gwendolyn Garcia ang temporaryo nga paghunong sa tanang culling activities sa dakbayan sa Carcar diin nasuta ang unang kaso sa African Swine Fever (ASF).
Kini human sa pakigtagbo ni Garcia sa mga mayor sa probinsiya arun nga hisgotan ang mga lakang sa pagpugong sa ASF sa dakbayan sa Carcar ug arun nga dili na kini mukatap sa mga silingan nga lokalidad.
Matud pa sa gobernadora nga nakahukom ang Kapitolyo nga mupatuman kini ug kaugalingon nga polisiya ug protocol sa pagdumala sa maong sakit.
Lakip niini ang pagpahunong sa kasamtangan nga gipahigayon nga culling.
Gidugang sa gobernadora nga dili tanan apan sagad sa mga gi-cull nga baboy kay walay sintomas sa ASF, kansang adunay incubation period gikan sa lima ngadto sa pito ka adlaw.
Wala makauyon si Governor Garcia sa pagpahigayon ug ‘culling’ sa dakbayan ug gani, nagduha-duha kini kung gi-unsa pagpahigayon ang laboratory tests nga nagpamatuod sa presensya sa ASF virus sa dakbayan.
Gitino sa Kapitolyo nga magpadayon ang ilahang istrikto nga mga border control sa Carcar City.
