Gihagit ni dismissed police officer Rodulfo Gracioso Jr. si Vice President Sara Duterte ug kanhi House Speaker Lord Allan Velasco nga magpailalom sa lie detector test kalabot sa iyang mga alegasyon.
Gihimo ni Gracioso ang hagit human gilimod ni VP Sara nga kaila siya kaniya ug nga nakadawat siya og mga maleta nga puno sa kuwarta.
Sa iyang pagbisita sa National Bureau of Investigation o NBI, nagsumite si Gracioso og mga litrato ug video nga matud pa niya nagsuporta sa iyang mga alegasyon.
Apan gipahayag sa NBI nga kinahanglan pa kining ipaagi sa authentication ug verification.
Gikumpirma usab sa Philippine National Police nga nahimong security detail si Gracioso ni Velasco.
Matud sa PNP, nag-atubang usab siya og administratibo ug kriminal nga mga kaso niadtong 2021 o 2022 samtang nadestino sa Police Regional Office 4-A.
Sa pagkakaron, padayon pang gisusi sa NBI ang mga alegasyon ug mga ebidensyang gisumite ni Gracioso.
