CEBU CITY-Patay ang Grade 8 student human malumos sa dagat sa dihang naligo kini kauban ang iyang 4 ka mga classmate dool sa pantalan sa Poblacion Argao Cebu pasado alas 3 kaganihang hapon.
Giila ang biktima nga si Benjamin Parantar ug estudyante sa National Argao School.
Basi sa imbestiigasyon ni PO2 Howard Maynupas sa Argao Police Station nga matud sa mga kauban sa biktima nga milangoy kini sa lawom nga dapit ug kalit nga gibikogan hinungdan nga naglisod na kini og langoy hangtud nga nalumos.
Giingong nagpanic ang mga higala sa biktima hinungdan nga wala dayon nasalbar ang biktima.
Hinoon dool lang ang opisina sa bantay dagat sa nahisgutang pantalan hinungdan nga dali ra usab sila nga nakaresponde.
Dali nga gidala ang biktima sa tambalanan apan gideklarar na kining dead on arrival.
Sa karon padayon pa ang imbestigasyon sa maong insidente ug padayon usab nga gisuta sa kapulisan kung aduna bay klase ang mga estudyante atol sa panghitabo ug kung nasayod ba ang mga ginikanan niini.
