CEBU CITY-Nilu-og nga panghitabo ang nadangatan sa usa ka 14 anyos nga dalaga human kini nga nadiskubrihan nga giluglog ang li-og ug wala na’y kinabuhi sa kalibunan sa Purok Caimito, Barangay Guimbawian, lungsod sa Pinamungajan, probinsiya sa Sugbo.
Giila ang biktima nga si Justine Andayop, Grade 8 student ug residente sa nahisgutang lugar.
Gisaysay ni Police Major Felicisimo Aranas, Jr., ang hepe sa Pinamungajan PNP, nga adunay ‘concern citizen’ nga nag-report sa kapulisan nga adunay patay’ng lawas sa nahisgutang lugar hinungdan nga dali kini nila nga girespondihan.
Matud pa nga nakita nila ang patay’ng lawas nga gitabunan og habol ug sa dihang ilahang gisusi, giingung aduna kini mga bun-og sa lawas ug samad sa li-ug niini.
Sa ilahang inisyal nga imbestigasyon, gipadayag sa hepe nga niadtong Dominggo sa gabii nakauban pa ang biktima sa iyahang mga igsuon sulod sa panimalay apan kaadlawon sa adlaw nga Lunes nawagtang na kini.Nasayran nga wala ang ginikanan sa biktima niadtong higayuna gumikan kay namaligya kini ug utanon sa Carbon Public Market dinhi sa dakbayan sa Sugbo.
Sa pagkakarun, nagpadayun ang imbestigasyon sa kapulisan ug giingung aduna na kini sila’y gisundan nga person of interest.
