CENTRAL VISAYAS-Mamahimo sa gihapon nga mosalmot sa Palarong Pambansa karong Hulyo ang mga graduating students sa dili pa mahuman ang school year 2023-2024.
Mao kini ang gipasalig ni Department of Education Central Visayas Director Salustiano Jimenez ngadto sa mga graduating students nga dili sila did-an sa pagsalmot sa national sporting event, nga ipahigayon sa dakbayan sa Sugbo.
Sa pakighinabi sa Bombo Radyo Cebu NewsTeam kang Dr. Jimenez gitino niini nga mamahimong makasalmot apan, kinahanglan ikonsiderar gihapon ang age restrictions nga gipatuman sa naasoy nga kalihokan.
Giklaro usab sa opisyal nga wala’y maapektuhan nga mga klase sa mga bata gumikan usa sa ilang mando ug tataw nga mamahimong makaapil sa practice ang mga bata ikahuman sa ilang mga tagsa-tagsa ka klase.
Kahinumduman nga gilagdaan ni Bise Presidente ug Education Secretary Sara Duterte ang DepEd Order No. 003 series of 2024 niadtong Pebrero 19, diin gikompirmar nga ang school year 2023-2024, nga sa sinugdanan gikatakdang mahuman sa Hunyo 14, gibalhin na sa Mayo 31.
