CEBU – Gisalmotan sa nagkadaiyang grupo ang prosesyon sa dakbayan sa Sugbo, diin lakip sa mga kalihukan nga giorganisar isip pagtapos sa kasaulogan sa pag-abot sa Kristiyanismo sa Pilipinas.
Ang Simbahang Romano Katoliko maoy nangulo sa closing ceremony sa 500 YOC uban sa daghang mga kalihukan lakip na ang Grand Solemn Foot Procession, ug ang Pontifical Coronation sa Patrocinio de Maria Santisima sa Boljoon, Cebu.
Ang Grand Solemn Foot Procession gipahigayon kagahapon sa Domingo ug gitapos pinaagi sa misa sa Cebu Metropolitan Cathedral.
Lakip sa mitambong mao ang pipila sa mga representante sa kongregasyon sa simbahang Katoliko nga gipangulohan ni Cebu Archbishop Jose Palma.
Sa misa, mihatag sa iyang mensahe ang Papal Nuncio.
Unod sa iyang mensahe nga wala nay laing importanteng misyonero kay sa amahan ug inahan kay sila man ang naghatag dili lang natural nga kinabuhi sa ilang mga anak, biolohikal nga kinabuhi, kondili naghatag usab sa kahayag ug kinabuhi sa pagtuo nga Katoliko sa ilang mga anak.
