CEBU CITY– Gikasuko karon sa Greenpeace, ang usa sa pinakadako nga environmental organization sa tibook nasud ang pagsulod sa mga tone -toneladang basura gikan sa laing nasud padung sa Pilipinas.
Kini ang nahimong pamahayag Angelica Pago, ang media campaigner sa Greenpeace sa pakighinabi sa Bombo Radyo Cebu.
Matud ni Pago nga wala pa gani naresolbar ang pagpabalik sa nasud sa Canadian ug South Korean waste, duna na usab bago nga nadiskubra nga basurang gikan sa Australia sa may port sa Tagoloan, Misamis Oriental.
Bisan matud pa ug giingong dili kini basura inay mga ‘recyclable materials’ ug usa kini ka ‘low grade fuel’ na gigamit para sa paghimo og semento, basura gihapon kini.
Dugang pa ni Pago nga ang giingong municipal waste ang grabe usab nga nakaapekto sa climate change.
Duha na gani hinoon ang mahimong atraso sa laing nasud–ang paglabay og mga langyaw nga basura ug ang paguba pa sa kalikupan.
Tungod niini, padayon nga nanawagan ang Greenpeace nga kinahanglan nga dunay himoon ang nasud niini ug dili tugutan nga himoong dumpsite ang Pilipinas.
Maka-ayo usab nga maratify na dayon ang giingong Basel Ban Amendment para mapugngan na ang pagsulod sa samang matang sa basura nga makasulod pa sa Pilipinas.
Nanawagan usab si Pago sa mga newly elected official sa nasud nga atimanon ang kalikupan.
Gihimug-atah niini nga importante ang paghatag og importansya sa kalikupan sanglit tanang tao sa nasud, naginhawa lang sa usa ka hangin.
