Malampusong gipahigayon ang usa ksa groundbreaking ug capsule-laying ceremony sa pagatukurog 150 megawatts nga Solar Power Plant sa Barangay Talisay, lungsod sa Daanbantayan sa amihanang Sugbo, Dominggo, Marso 16, 2025.
Kun diin gipangulohan ang maong kalihokan nila ni Cebu Provincial Governor Gwendolyn Garcia, Vice Governor Hilatio “Junjun” Davide III, Daanbantayan Municipal Mayor Sun Shimura, 4th District Rep. Janice Salimbangon og mga opisyales sa kumpanyang ACCIONA (operator) ug Power China (contractor) sa proyekto.
Nagtimaan kini sa usa ka malungtarong proyektong pang-imprastruktura sa lalawigan sa natad sa renewable energy.
Sa samang kalihokan,isip pagtimaan sa makasaysayanong panghitabo, nagtanom sab ang mga opisyal og mga punuan pinaagi sa Ceremonial Tree-Planting for Collaboration sa maong proyekto.
Isip pagrepresentar sa Pilipinas, nagtanom sila Garcia, Davide, ug Shimura sa Narra tree samtang Kalamata Olive tree ang gitanom sa mga representantes sa Spanish-firm nga ACCIONA ug Chinese Bamboo sab sa mga tinugyanan sa Power China isip contractor.
Ang multi-billion peso nga proyekto kay napatuman sa usa ka public-private partnership nga tukuron sa 187-ka ektarya sa luna nga gipanag-iya sa Kapitolyo sa Sugbo sa naasoy nga dapit.
Gilauman usab nga makatabang sa pagtubag sa nagkadako nga panginahanglan sa enerhiya sa Sugbo ang proyekto sa padayong nagkasaka nga demanda sa kuryente sa probinsya.
Gawas sa pagkolekta sa abang gikan sa maong luna, ang Kapitolyo gilauman usab nga makamugna og kita gikan sa bahin sa gross sales sa kuryente ingon man sa brokerage fees ingon man nga human sa 25 ka tuig, ang tibuok nga pasilidad mapanag-iya na sa Kapitolyo.
